السبت، 12 يوليو، 2014

منامنامناه


في حاجة بتحصل في الفترة من خمسة ونص لستة صباحا بتجمع كل المخاوف دي جوايا
:(
الكوابيس بقت تقليد شبه يومي.. بقيت عارفة مواعيدها، وعارفة الحالة اللي هاصحى بيها وعارفة كمان نوبة العياط اللي بعدها وأنسب مكان في الأوضة علشانها!


زمان..
كان اللي معدي جنبي وأنا نايمة لازم يصحيني علشان صوت ضروسي وهي بتضغط ع بعض عالي!
دلوقتي مافيش حد يسمع الصوت ده.. يمكن علشان كده بقول لنفسي ما بيحصلش، لكني بصحى من النوم وصوابعي بتوجعني.. النهارده لما فقت من الكابوس أخدت بالي إن صوابعي مقفولة على كفي جامد!



الكابوس النهارده كان ليه "تيمة" مختلفة!
كان عن الناس القريبين اللي بيأذوا من غير ما ياخدوا بالهم.. كان عن الرعاية المقدمة بطريقة مختلفة كتير عن اللي محتاجاه!

عن الأفعال اللي من نوعية: نأكل العصفورة أيس كريم علشان طعمه حلو واحنا بنحبه!


العصفور لو مات.. يستاهل، هو اللي وثق كفاية إن حد تاني ممكن يعرف مصلحته أكتر منه..


ليست هناك تعليقات: