الثلاثاء، 22 أبريل، 2014

الثلاثين: تقرير موجز

..
-ايه أهم معلومة لازم نعرفها عن المحيط؟
-إنه خطير!
نيمو
ـــــــــ
حسين سألني:" قولي لي حاجة حلوة قوي عن نفسك يا رضوى"
وأنا قولت: " حد يوم دعالي ربنا يحبب فيكي خلقه" ويبدو يعني إن الدعوة استجابت!
وإني اكتشفت إني قوية جدا.. أكتر بكتير مما كنت أتخيل.. الإنفكشن بتاعي يبدو مش بسيط لكن جسمي بيقاوم بشدة أنا مبهورة بيها الحقيقة!"
ـــــــــ


السنة اللي فاتت ماكانتش سهلة أبدا
ثمن شهور دموية جدا على المستوى العام..
أربع شهور دموية جدا على المستوى الخاص!
ـــــــــ

كاترينة..
سافرت لسانت كاترين خمس مرات؛ يونيو - أغسطس - ديسمبر - فبراير - إبريل
أنا طلعت تلات جبال!
آه والله،، دلوقتي وأنا بعدهم على صوابعي اكتشفت إنهم تلاتة.. وأبتهجت جدا جدا
جبل موسى: يونيو 2013
I can do it by myself
جبل عباس: ديسمبر 2013
I'm in deep need to a family

جبل كاترين: إبريل 2014
Friends are just friends.. 
They will never replace Family

ـــــــــ
أخر ست شهور أنا بتعلم عن نفسي حاجات كتير جدا..
أخيرا نجحت أفتح الستارة وأدخل النور لأكثر مكان مظلم في قلبي..
ـــــــــ

دكتورتي بتقول إني لازم أكتب وإنها مستنية مني روايات كتير.. أنا مش عارفة.. عايزة أكتب حواديت للأطفال!
اتفقنا كمان أعمل ورشة تبسيط علوم!

أظن -ودي حاجة ممكن أرجع فيها عادي- إن اهتمامي بالأطفال هو محاولة لرد الجميل لوقت كنت فيه طيبة جدا :)

ـــــــــ
طول عشر سنين أنا بحلم ببيت مفتوح لدايرة الناس القريبين مني.. الخميس اللي فات كان أطيب ما فيه إن جزء كبير من الدايرة دي كان في بيتي!
الصحيان بدري.. تجهيز الأكل.. الرغي مع رضوى في المطبخ..
وصول الشلة وتجهيز الباقي من الأكل..
هشام بيقلب صوص الفراولة على النار ورضوى بتضبط مقادير صوص الشوكولاته
التشيز كيك اللي عملها عبد المحسن
التراكات التسعيناتي اللي شغلوها..
أكبر براد قهوة عملته..
الـــ CTC اللي عملها هشام وطلع مالهاش أي علاقة بالتوت!!
وأحمد وهو واقف بيغسل المواعين.. :)
القرنفل اللي جابتهولي شيكو..
مروة وهي بتقول أنا إزاي كنت هافوت اليوم الحلو ده
ومروان وهو بيحاول يهرب من تقي :D

الضحك.. اللي بقى في المطبخ يونسني أخر الليل..
..
ـــــــــ
للسنة التانية على التوالي بقضي الكام ليلة الأخيرة في السنة مريضة وسط الأدوية والتحاليل..
المرة دي فيها حاجة حلوة
أمنية فاطمة وتوصيتها على علبة المضاد الحيوي :))
ـــــــــ
وكما هو واضح إني صورت السنة دي أكتر ما عملت أي حاجة تانية في الحياة..
يوم الجمعة كنت بقول لنهى إن أكتر حاجة أنا مهتمة بيها هو تصوير وشوش الناس.. مش فن البورترية اللي الناس بتحترفه قد إني أحتفظ بانعكاس الأرواح اللي بيبان في العيون وتعبيرات الوشوش..
إني أحتفظ بالجمال اللي ربنا رزقني القدرة على ملاحظته..
تعليقا على صور يوم الجمعة فضل كان بيقولي لازم العدسة ال50mm والله..
وأنا أظن إنها هاتبقى معايا قريب جدا..
ـــــــــ
فيه ناس هايفضلوا في القلب.. حتى لو التواصل بينا ضعيف جدا
..
ـــــــــ
تحديث: فاطمة أكتر حد شجعني على التصوير.. بشكل كبير مكالماتنا كانت حافز إني أصور المشهد قدامي وأبعتهولها.. فحب كبيـــــــــــــر لفاطمة ❤ ❤ 

هناك 5 تعليقات:

حنين يقول...

عبد المحسن عمل تشيز كيك؟؟؟ تشيز كيك يا ظلمة؟؟ :( مفيش أي حاجة للغلبان اللي مقضيها غربة ده؟ :(
....
على ناحية أخرى، أنا مبسوطة إنك بتحاولي وتعافري مع الدنيا، الوقوف في مكان واحد ده مش لطيف ومش ح يساعد حد ولا حاجة.. سافري وشوفي الناس واخرجي وحاولي تتجاهلي العوَء لأنه طايلنا، متدوريش عليه، تجنبيه.
خليكي كويسة، وربنا يحمي قلبك ويحمي حبايبك
كل سنة وإنتي طيبة :) :*

Radwa يقول...

عبد المحسن عمل تشيز كيك :DD
وكله متسجل صوت وصورة والله

ربنا يرد غربتك يا حلوة.. لازم المرة الجاية تبقى في القاهرة نقضي يوم عندي وعبد المحسن يعملنا تشيز كيك تاني

:*
بوسة لقلبك

حنين يقول...

لازم لازم آجي لك وآكل التشيز كيك، لازمن ولابد وحتمن :)
ربنا يخليكي جدًا.. خليكي كويسة :) :*

مروة يقول...

ربنا يديمك نعمة ف الدنيا اللي لا يمكن تتعاش غير بالأرواح الطيبة والقلوب المنورة اللي زيك يا رودي.
يا رب يفضل بيتك نور مجمع كل حبايبك وربنا يملاه بالود والسكن والطمأنينة اللي تستحقيهم يا أطيب أميرة للحواديت :)
كل سنة وإنت بتصوري وتكتبي وتحققي كل خير تتمنيه يا رب
<3 <3

Lobna Ahmed يقول...

كل سنة وانتي طيبة وحلوة :)