الجمعة، 10 يناير، 2014

كلام جد!

..
كام مرة كنا بنتكلم وقريبين جدا وبعدين أنا فجأة تحولت لشخص بارد مش قادر/عايز يتكلم؟
..
هاحكي موقف صغير "متكرر"
صديقة عزيزة جدا علي قلبي، كانت بتكلمني في التليفون يوم الصبح، وبعدين بتقولي إن الموقف الفلاني حصل، حالة وفاة، وإنها قالت ساعتها تهوينا إن الوضع ده أيسر كتير من وضعي -أيوه أنا-..
كملنا كلامنا عادي وخلصنا المكالمة
..
طيب الكلام ضايقني طبعا، لكن مع فهمي الكامل لنواياها الحسنة، وإدراكي إن فعلا وضعي أنا أصعب وأعقد كتير.. يمكن لو كنت أنا نفسي حاضرة كنت هاقول نفس الكلام!
لكن
تفتكر/ي الموقف كله ما ألمنيش؟
اتألمت.. بشدة
ومن غير غضب
في اللحظة دي وللأسباب اللي قلتها فوق أنا مازعلتش كنت بس محتاجة مساحة أخد جنب لحد ما الألم يخف شوية وأقدر أرجع أتكلم معاها تاني بنفس السلاسة.. وقد كان!
..
الوقت اللي هاخده قد ايه.. ماعرفش
لكني عارفة إن كل ما الألم كان أشد كل ما هاخد وقت أطول..
البعض بيبقى شايف إن المصارحة في اللحظات دي أنسب تصرف.. لكني مابعرفش أعمل ده.. لإني هاضطر أقول كلام مؤذي وأسمع كلام مؤذي.. وأنا أصلا من الأول فاهمة إن النوايا طيبة.. وفي الأخر هارجع تاني أطلب وقت لواحدي -بعيدا عن الصديق/ة دي تحديدا-.. 
..
الفكرة بقى إن السيناريو ده بيتكرر بتنويعات مختلفة، الأشخاص اللي بيقبلوا أختفائي وحاجتي لمداواة نفسي بعيد هما اللي علاقتنا بتستمر لسنين طويلة.. جدا
الأشخاص اللي مش بيقبلوا خفوتي ده.. هما اللي مابعرفش أحافظ على علاقتي بيهم!


حاول/ي ماتكونش من المجموعة التانية 

حاول/ي

حاول/ي

هناك تعليقان (2):

The window يقول...

لما قريت "الخاطر" ده .. حسيتك لمستي جبل التلج اللي جوايا .. من مدة طويلة مقدرتي على التأثر والشعور بالحزن والفرح بسيطة جداً .. عندي شعور بإن مشاعري اتدفنت تحت جبل تلج .. طول الوقت منتظرة معجزة تصهره وارجع تاني بفرح أوي وأزعل أوي زي زمان .. ربنا يسلملك حالك وطريقك :)

غير معرف يقول...

( so all what was said before wasn't serious talking ? )

i don't know if i am included in the object of this post in the first place
i m not sure now if i ever was "included" anywhere .

assuming , i have been trying , very hard , it cant be that you didn't notice how hard i was/am !

and will continue trying
assuming that this is what you wish ,, which i now (and only now) can figure out (still can't understand)

& wish you can figure out too , what your good (long term) friends have never mentioned to you ; which is they were bearing their share of pain , while you were trying to heal, by isolating them or yourself .
did you know ?