الجمعة، 19 يوليو، 2013

ضفيرة.. 2

الجمعة 19 يوليو -10 رمضان

في الحلم:
قرف "مجرد-مطلق" تجاه أغلب التجمعات البشرية/ الغربة-الوحشة بتغرس ضوفرها في لحمي/ الكراهية كائن مشوه الملامح بيحاول يتسلل لأحشائي!!

صبح:
سلاسة.. كل حاجة سلسة جدا ورغم جفاف الحلق والنوم القليل ذهني صاحي جدا/حليت السودوكو في أقل من خمس دقايق! كل حاجة جاهزة إلا إن الطرحة مبهجة قوي على اللي ف قلبي/لبست طرحة أهدى.

بنات صغيرة (17-20 سنة) بتكنس الحارة البطيئة عند مدخل الحي/ غضبي صوته بيعلى جوا دماغي رغم محاولاتي لصباح رايق/البنت اللي واقفة قدامي لابسة كاب وبالطو عمال النظافة البرتقاني شغلتها إنها تنضف الشارع من علب العصير والكانز وورق الشوكولاته اللي بيرميه السادة السكان وزائري مول العرب.

عربية نص نقل حمرا محملة شباب في نفس السن/ معاكسة وشوية إشارات بالإيدين ع الريق كده / يافطة بتنور في دماغي مرحبا بكم في مصر2013/ تلاته قاعدين فوق كابينة السواقة/النص نقل ركنت على جنب تقريبا على بعد 2 متر من المكان اللي كنت واقفه فيه/ بحث في الموبايل وعليت صوت أم كلثوم/

في عقلي:
الشباب بينزلوا من النص نقل مسلحين/ جرح قطعي من كتفي اليمين لحد جنبي الشمال بسافوريا =/ كسر في الجمجمة مكان وصلة النضارة بين عينيا وجروح متفرقة نتيجة طلق خرطوش/ بقع دم على الأرض/ أنا مجرد جثة مشوهة ومرمية على جانب الطريق.. مافيش جديد!!



ليست هناك تعليقات: