السبت، 8 يونيو، 2013

طبخ!

Leon Zernitsky

علاقتي بالمطبخ زي علاقتي بحاجات كتير جدا بدأت في الشقة دي..
بفكر ممكن زي حبي للكتب والقراية وزي حبي للمزيكا الكلاسيك وزي أول مرة اتعلمت فيها الرقص النوبي، ركوبي العجل والباتيناج..
كل الحاجات دي اتعلمتها في نفس الفترة العمرية تقريبا اللي هي بين 8 -10 سنين، وطبعا الحاجات دي كلها ابويا كان معايا فيها.

أول درس كان التقطيع..
اتعلمت إزاي أمسك السكينة واستخدم لوح التقطيع واخليه "يساعدني" بتعبير بابا. يمكن علشان كده عندي مايشبه الهوس بالسكاكين؛ أول حاجة بفكر إني محتاجاها لما بدخل محل بيبيع أدوات طهي هي السكاكين..

تاني درس كان في السوق وده كان سلسلة متتالية.. إزاي أنقي الخضار والفاكهة والفروق بين الخضرة واساميها وكده..

لكن أول مرة في المطبخ كانت قبل الفترة دي بتلات سنين تقريبا في شقتنا في امبابة، فاكرة كتير من تفاصيل اليوم ده رغم كل السنين اللي عدت..
كنا لوحدنا في البيت عملنا بان كيك وجرانيتا خوخ.. ماجربتش ابدا اعملها رغم إني كل مابفتكر اليوم طعم الخوخ وريحته بيحضروا..
وقعدنا نتفرج على كرتوني المفضل اسألو لبيبة.. كانت حلقة عن جورج ستفنسن والقطار البخاري..
فاكرة اليوم ده بتفاصيل زي اتجاه نور الشمس من الشباك ونبرة صوت بابا وهو بيرشدني اساعده وحاجات كده

أظن اليوم ده هو اللي الطبخ في وعيي بقى فعل مختلف عن مجرد تجهيز الأكل وتسويته..
بقى جزء من فعل المشاركة مع الناس اللي بنحبهم.. اممم أظنه من ساعتها بقى فعل احتفاء باننا عايشين اللحظة دي مع بعض..

"المشاركة في الطبخ فعل احتفاء بالحياة"

هناك 3 تعليقات:

Muhammad يقول...

ايه يا عم البوستات الحلوة اللى تجوّع دى؟

Radwa يقول...

:D
أعملك ساندوتشين طيب؟

اضف وصفتك مع ملك الارز يقول...

بشكركم على المدونة المميزة دمتم بود
و اطلعوا على وصفات شهية اخرى معنا
طاجين الارز المغربى بالدجاج
اكلات بالارز البسمتى