الأحد، 7 أبريل، 2013

ليلى!!

أكتشفت النهارده إن أكثر خوف بيهاجمني إني أصحى من النوم في مكان تاني غير بيتي!!
ده مدهش جدا بالنسبالي؛ يمكن لإني غيرت مكاني مرات كتير قبل كده..
و يمكن ده طبيعي جدا لإني من وقت قريب قوي بدأت أقول عليه "بيتي" يمكن علشان كده، علشان كده خايفة أصحى من النوم في مكان تاني مش بتاعي؟!

أكتشفت إني مابقتش باخاف م المرض و الموت!!
بقيت بخاف أكتر من الوجع اللي ممكن يحصل نتيجة تصرفاتي، أكتر من الحاجات اللي ممكن تحصل و ماليش يد فيها!

أكتشفت كمان إني مستمتعة جدا بالونس مع نفسي، و مش عايزة حد -أي حد- يدخل المساحة الفاضية الواسعة قوي دي اللي ملكي أنا لواحدي!!

أفتكرت كلامها عن الفترة اللي كانت فيه تعبانة جدا و مافيش دكتور كان عارف يحدد السبب..
الكلام ده قالتهولي في نفس الفتر اللي كنت فيها تعبانة برضه و تايهة في عالم تاني بيمارس هوايته الوحيدة في التسلية بوقتي و بأعصابي!

ماقدرش أقول إني أفتكرتها النهارده
لإنها على بالي على طول
بس النهارده بالذات.. -لإنه النهارده-
قولت اسمها أربع مرات
يمكن لإني أدركت و أنا بعد على صوابعي إن مر 3 سنين!!
وحشتني.. بالتأكيد

ليست هناك تعليقات: