السبت، 10 مارس 2012

أنا بفكر فيكي كل مرة أقطع فيها البصل في المطبخ و تنزل دمعة و تقف على طرف مناخيري و ألف في الشقة أدور على منديل، و كل مرة أغسل فيها المواعين و كمي  يتزحلق و أحتاج حد يشمرهولي!!
و بطلت أغسل سناني أول ما أصحى من النوم، علشان فيه واحدة شبهك قوي بتبصلي باستغراب في المراية و كل مرة بشوفها بتخض و باخد وقت كتير علشان استوعب إنها مش إنتي..
و كمان بطلت ارفع إيدي و ادعي لنفسي، أصلي كل مرة بدعي فيها بحس إنك أحق مني فابدعيلك و بنسى هو أنا أصلا كنت عايزة ايه! و أرجع أقول لنفسي أكيد ربنا عارف..
ابن مي سموه حمزة زي ما باباه ما شاف في الحلم، عارفة كنتي هاتحبيه قوي مش بس علشان عشري و ضحكته تفرح القلب لا ده كمان شبه بابا قوي، إنت الوحيدة اللي كنت هاتاخدي بالك م الموضوع ده، احنا فضلنا كتير مش قادرين نعرف هو شبه مين، بس خالو الله يرحمه أول مرة شافه فيها قالي ده شبه عبدالله خالص و دمه خفيف و حبوب زيه!! صحيح ماتنسيش تسميلي على خالو كمان..
انا ماروحتش المعادي من ساعتها!
بس احتمال كبير أروح الإسبوع ده و أمشي ف نفس الشارع..
فيه حاجات كتير قوي كنا بنعملها سوا و بطلت اعملها خالص، أصل بصراحة مالهاش طعم!!
حتى الفرجة على الأفلام من اللاب بتاعي، بنام بعد أول عشر دقايق من الفيلم، و برامج التوك شو، حتى بطلت أكلم نفسي في المراية أو حتى أكتب عليها زي زمان..
و فيه حاجات نسيت اسألك عليها
فيه مفتاح في درج البانو لواحده في حلقة مش عارفة بتاع ايه!!
و فيه ورق "مهم" مش عارفة مكانه فين!
و كمان توابل الطبيخ مش عارفة اضبطها بطريقتك، الأكل بيطلع طعمه حلو صحيح بس مش شبه بتاعك

فيه روايات كتير قوي بقيت اقراها لواحدي.. و مش لاقيه حد اتكلم معاه فيها
ايام كتير مش بلاقي أحد أخد رأيه في الإشارب بتاعي إن كان لايق على الهدوم و لا لأ
أنا بقيت بلبس flat طول الوقت، بس أوعدك في أول مناسبة هاجيب حاجة بكعب عالي زي ماكان نفسك تشوفيني
و كمان بطلت استخدم العدسات، النضارة عمليه أكتر ياماما و مش بتضايقني .. معلش

وحشتيني

هناك تعليق واحد:

AK يقول...

ربنا يرحمها ويغفر لها ويرزقك الذريه الصالحه تكونى خير ام زى ما انتى خير بنت. على فكره هى معاها حق فى موضوع الكعب.
اللهم ما ارحم امواتنا واموات المسلمين