الخميس، 9 فبراير 2012

شوية أفكار مش مهمة خالص


أنا كل ما أفكر فيه تيجي قصاد عيني صورة براح، راحة ... وشمس المغربية، بيت صغير صدره واسع، شبابيك كتير مفتوحة، وستاير شفافة تحركها النسايم.... جاية ومعاها ريحة يود البحر
كل ما ييجي على بالي بسمع في ودني صوت فيروز ودرويش وموسيقى مارسيل، بتخيل اسطوانة للست شغالة على جراموفون كُهنة بعد نص الليل 
كل ما أقلق عليه بفتكر رغبتي المستمرة في محل الورد، رغبتي الملحة في السفر، بحس فجأة إني عايزة أتعلم الخبيز ... إني نفسي أبقى ماما أوي.
بزهد في الدنيا كلها، والحاجة الوحيدة اللي بتمناها لمستقبلى اني أعيش لحد ما أتحول لست عجوزة قاعدة على كرسي قدام المحل بتاعها بتغزل كوفية صوف تحت الشمس، وهو قاعد جنبها يدخن سجايره فى منتهى الكسل 
كل ما أحس إني عايزة أتكلم معاه يبقى نفسي أعتذر له عن حاجات كتير معرفهاش .. عن إني سايباه وقت طويل لوحده، عن كل الألم والوجع.. أضغط على ايده وأقوله معلش .. ببقى عايزة أجمع كل الخيال دا وأبعتهوله في صورة طاقة ايجابية تخليه يعرف ينام بالليل !
أنا بس مش عايزة الموت يكسرنا ..


كل ما أفكر فيه ييجي ف بالي ولد صغير واخداه في حضني، أوقات بحس إن عندي أمومة زايدة تجاه البشر، نفسي أطبطب على راسه و أقوله ماتخافش هانبقى كويسين. كل ما ييجي علي بالي بتخيله و هو بيغني أغنية بحبها و يبوظلي لحنها و كلماتها. كل ما ظهري بيوجعني من الشيلة بحس بكتفه جنب راسي هاميل عليه و اتسند و اسنده..
كل ماحس إن صوتي محشور و مافيش فايدة من الكلام،
أغمض عيني و أشوفني و انا بتكلم معاه و بقول كل الأفكار المجنونة اللي بتيجي على بالي


كل ما بفكر فيه 

بابقى عايزة بس أوقف صوره الكتيرة اللي ورا بعض
برجع شريط الجوار بينا من الأول وببطء
بسمع صوته تاني وأوقف الشريط على ابتسامته ساعة ما قال الجملة دي
وسط كل دا بنت جوايا بتقعد تضحك عليّ وتقولي بطلي هبل
بصي كويس في المراية
تفتكري إنتي ناقصة جرح جديد؟

المشهد بيبتدي رومانسي
الراجل والست بيحبوا بعض وبيقربوا من بعض بنعومة وحب
وبعدين فجأة حد فيهم يكتشف إنه اللي قدامه
جسم جبس متفرغ من جوة
وإنه كل المشهد اللي فات دا كان حلاوة روح أو هلاوس بصرية طويييييلة

مش ممكن حد يشوفني معاه وميجيش في باله إني بحبه
بس كل دا مش مهم دلوقتي

أهم حاجة إني بفكر فيه وإني لسة مصدقة في وجوده
خيط الأمل المشدود لسة مدبحنيش مع إنه بيقرب من رقبتي أوي


غادة - نهى - أنا

هناك 4 تعليقات:

مدونة رحلة حياه يقول...

السلام عليكم
عجبانى قوى الراحة اللى مكتوب بها البوست دا
من اجمل ما قرأت
دومتى بخير

مهــــا يقول...

ليست قوة واحدة ولا قوتان بل ثلاث

ازاي بيحصل التماهي و التوافق ده يا فنانين

هاخمن ترتيب الكتابة:
غادة ثم رضوى ثم نهى ؟؟

مهــــا يقول...

:)))
ماشي انا خدت 1 من 3


يا نهى .. الجزء بتاعك جميل أوي .. أيا كان الطريقة اللي كتبتيه بيها
اكتبي بالطريقة دي كتيييير :)

AK يقول...

تخمينى هو رضوى ثم غاده ثم نهى

جميل التنسيق والتناغم

يا رب يستمر علطول