فقاقيع صابون .. عن الكائنات الحساسة

مش لأني ساكنة بعيد

لأن طريقي طويل

عارفة -موقنة- إن مافيش حد ممكن يوصلني

طريقي لازم امشية لواحدي

او على الأقل ده الإحساس اللي عندي

عموما شكرا على العرض

..

مش لان بتعجبني حاجات غريبة في الشارع

بس بجد نفسي ف مرة حد يوقفني و يجبلي اللي عجبني

لعبة بتطلع فقاقيع صابون كبيرة

و زي كل حاجة بتفرقع بعد شوية

..

ماهو ماينفعش ابدا

ابقى بعمل كل الدفاعات النفسية دي

علشان أقابلك 

او اكلمك في التليفون

ممكن تقولي

بعد ما اجهزها كلها

إزاي نقدر نفضل أصحاب

.

اسفة .. مش عارفة أقول مبروك لحد

..

انا بتفزع

مرات كتير في اليوم

من غير سبب واضح

و لأسباب كتير منطقية

لكن صعب تفسيرها

انا بفرح

اوقات كتير

و من غير سبب واضح

و لأسباب كتير منطقية

لكن فرحتي

مابتقدرش ابدا
تفضل معايا 
لحد ما اخلص طريقي

زي فقاقيع الصابون