الجمعة، 3 يونيو، 2011

1 .. ميكانو

كان عندي ميكانو، بابا كان جابهولي و غالبا من غير مناسبة - كل لعبي كانت بتيجي من غير مناسبة- الميكانو كان من أكتر اللعب اللي كنت مبسوطة بيها قوي و فضلت العب بيه لحد سن كبير هو و الباتيناج...

ماما كانت بتضايق منه لأني كنت ببعتر المسامير و الصواميل في كل مكان و مش بلمهم كويس بعد ما اخلص و كان عندها احساس ان بنتها هاتكبر و تبقى ميكانيكي (: بابا ماكانش بياخد باله..

افتكرت امبارح اني ما كنتش بعمل مشاريع زي اللي موجودة في المانيول اللي كان جاي مع الميكانو كنت دايما بعمل حاجات بتاعتي بيت صندوق أو مكتبة حاجات كده مالهاش علاقة بالمانيوال..

انا افتكرت ده لما اخدت بالي اني عايشة حياتي كده دلوقتي، طول الوقت برتجل، بركب حتت الميكانو بالشكل اللي يناسبني و يريحني

المشكلة بتبدأ لما تكتشف ان قطع اللعبة بتختفي، و بتوه منك فا مش بتعرف تلاقيها بسرعة أو مش بتلاقيها خالص.. ساعتها بقى بيبقى تكوين شي خاص بيك بيبقى اممم ..

صعب ببساطة ،، صعب قوي

بس الأصعب؛ لما التكوين يختفي بعد ما تعمله ، لما تضيع منك تفاصيلك ..

هناك تعليقان (2):

لبنى أحمد نور يقول...

ومجبرين نلعب وندور على القطع الناقصة نلاقيها وما نلاقيهاش

شيماء عبد المُنعِم يقول...

لما تضيع منك تفاصيلك ... حلوة أوى يا رضوى :) تسلم أحاسيسك