الثلاثاء، 10 مايو 2011

نور .. اتطفى

نور..
خالو "نور" مات
أول امبارح بس كنت ماشية جوا الجامعة و بفكر أن فيه حاجة بتقطع صلتي بالناس ،، حاسة بالغربة جدا ، و قلبي كان موجوع قوي ،، و لما شفت "طبق الديابة" كل الفكرت فيه اني محتاجة حد ياخدني ف حضنه و يضمني قوي ..

ماقدرش أقول بقالي كتير بفكر في الموت ، ممكن أقول بقالي كتير مابطلتش تفكير في الموت، انا كان قلبي مقبوض زي اليوم اللي مات فيه عمو عزت و انا عرفت انه مات بعدها أسبوع ..

امبارح بقى فضلت أقاوم رغبتي في مكالمة تليفون غير مسببه،، كل ما أفكر في كمية البرود المصطنع اللي هاسمعها و هاتساويني بالأرض.. و كأني يعني مش متساوية أصلا .. أسيب الموبايل على جنب و ابلع الوجع و أسكت..

ايوه ، استدعيت خطة دفاعية ، كان شكلها مناسب جدا ساعتها و فضلت أفكر نفسي أن ماينفعش نعمل الحاجات لمجرد اننا عايزين نعملها،، و أني كبرت بقى و الكلام الفاضي ده ، في الاخر ماينفعش اتكلم في التليفون بس علشان عايزأسمع صوت ، مهما كان واحشني،،

هو انا ليه لما عملت المكالمة في الأخر،، و ده طبعا لأن كل خططي الدفاعية بتفشل، مالقتش البرود اللي كنت متوقعاه ، بس كمان أنا ماعنديش كلام يتقال،، اه بصراحة بقيت بخاف .. أقول أني موجوعة و خايفة و بفكر في اصحابي اللي ماتو- طلعوا كتير قوي بالمناسبة- .. لما تليفون البيت رن ماكنتش قادرة ارد بقى
عملته صامت و خلصت مكالمة التليفون الهلامية و ...
مانا كمان اكتشفت اني ممكن اعيط ..
.
.
.
عادي
.
.
مادام ماحدش واخد باله
.
.
يبقى عادي
.
و انا بعيط جالي الخبر،، في رسالة لأني ماردتش على تليفون البيت و لا الموبايل بعد كده ..

خالو نور ..

هو احنا مكتوب علينا الفراق!!

هناك تعليقان (2):

سعدية يقول...

البقاء لله يا اميرة
قلبك عندك

غير معرف يقول...

بفكرفي الموت علي طول وحسه قلبي مقبوض وصعوبه واناباخدنفسي