الاثنين، 10 يناير، 2011

Join the CLUB

ما بتخلص.. اه و الله ما بتخلص
استمارات استمارات استمارات.. كل خاناتها x
و كل مرة تكتشف من قبل ما تبدأ انك ساقط بتقدير ممتاز
صفر مستحق في كل المواد
كل التجمعات اللي ليها متطلبات "خاصة" ..
مش قوي كده يعني كلها حاجات عادية، بطة بنت البواب تقدر تنضم ليها بس انا لأ
كلهم ناس لطاف جدا لذاذ جدا مبتسمين "جدا" و طيبين كمان "جدا"
بس وسط كل ده متداري نصل لامع قوي .. جارحة قوي
مش لازم حد يسألك " ماما عاملة ايه؟" أو " ها يا رضوى مافيش عندك مشروع كده;) "
كفاية قوي قوي أن كل واحدة تعدي من جنبك أو تفكر تعدي من جنبك تتأكد تتأمل صوابع إيديك الأتنين علشان تعرف ان لسه مش عندك مشاريع كده ;)
كفاية قوي تحكي قد ايه ماماتها -ربنا يخليهالها يا رب و يباركلها فيها- بتساعدها في كل حاجة و مابتعرفش تعمل حاجة من غيرها، كفاية تحكي قد ايه أبنها أو بنتها بيتبسط قوي و بيتنطط م الفرحة أول ما يشوف جدته.. كل ده كافي أنه يفكرني أن لما بقى يبقى عندي أولاد إن شاء الله يعني مش هايبقى عندهم تيته يتبسطو و يتنططوا م الفرحة لما يشوفوها..
كفاية كل واحدة في اللي موجودين تتأكد تحضن جوزها و تبوسه - اه و الله- علشان تعلم عليه يعني و تقول احذري هذه المنطقة ممنوع الاقتراب أو التصوير
D:
.
بس هو الموضوع في الحقيقة بقى مش كده
بيني و بينكوا يعني .. هو ايه اللي يوديني مكان فيه ناس متجوزة و قاعدة مع اجوازها اصلا
يعني مانا اقعد في بيتنا معززة مكرمة و اخرج المشاوير مع الناس اللي زييي و يوم ما تحبك قوي ابقى عامله حسابي بقى،، بس ماهو لما بعمل كده بطلع برضه غلطانه و كئيبة و مش عايزة اشوف الناس
.
.
طيب انا غلطانة و كئيبة و مش عايزة اشوف حد
..
ممكن بقى ماحدش يزعل لما يكلمني ف التليفون ما اردش عليه

ليست هناك تعليقات: