الخميس، 10 يونيو، 2010

بطلت

لما بطلة الفيلم راحت للراجل اللي هاتتجوزه و قالتله انها بطلت ترسم مافهمش, و رد بتلقائية شديدة انها ممكن ترسم الموضوع بسيط!!
بقالي اسبوعين نفسي افهم انا بطلت اعمل ايه, كتابة و بكتب قراية و بقرا و شغل و بشتغل مذاكرة و بذاكرة نوم و بنام اكل و باكل اصحابي و بقابلهم يبقى ايه؟؟
الحقيقة عرفت النهارده انا بطلت ايه..
انا بطلت حاجة غريبة جدا و بسيطة جدا و عادية جدا كل الناس تقريبا بتعملها
انا بطلت اتكلم..!
ايوه .. انا بطلت اتكلم, بطلت احكي ايه اللي حصل النهارده و بطلت كمان اقول قريت ايه النهارده و بطلت احكي عن الافلام اللي بشوفها و الاغاني اللي بسمعها و الناس اللي بقابلهم.
انا بطلت اتكلم!
بطلت احكي عن الابتسامة اللي استاذي قابلني بيها و الانبساط اللي خرجت بيه من مكتبه.
بطلت احكي عن تصرافات الناس الغريبة في المواصلات و كمان الكتب الجديدة اللي لقيتها في مكتبة الهيئة اللي ف الجامعة..
بطلت اسأل هو الهدوم دي كده الوانها لايقة على بعض,, طب الطرحة دي احلى و لا دي ..
بطلت كمان أطلب "ممكن تاخديني في حضنك" ..
و بطلت اقول اني بحلم ب ...
و بطلت اقول انا نفسي اكل ..- و ده لأن فعلا ماليش نفس-
بطلت اقول انا عايزة اسافر..
و كمان بطلت اقول ..
... حاجات كتير قوي
تحديث :
وحشتيني بجد
بعدكم مابقاش فيه حد يسمعني- او على الاقل ده اللي حساه دلوقتي-

هناك 5 تعليقات:

مها رضوان يقول...

i liked it

:)


و الموضوع بسيط
ارجعي قولي

:)))

مدونة يقول...

لما تبطلي تتواصلي مع العالم اكيد في حاجة مزعلاكي منه..يمكن فُتوره؟

رضوى يقول...

مها
الموضوع "يبدو" بسيط
بس سؤال : أقول لمين؟؟
لو مافيش حد يسمع بجد يبقى ايه لازمة الكلام؟؟

...

مدونة

فيه حاجات مزعلاني منه, موجوعة قوي, من حاجات كتير و ناس أكتر
:(

الحمد لله على كل حال

آيــة يقول...

يا قلبي يا رضوى
:((

عارفة ان انا كمان بطلت ؟
:((
بس انا ف الاول سميت اللي بطلته ده اني بطلت اخد بالي م التفاصيل ف الحياة .. بس بعد شوية اكتشفت ان معادش حد بيهتم بالتفاصيل اللي اتخلقت ف لحظات كتير عشان تتحكي و تتشارك ...

انا كمان مفتقداهم .. و مفتقدة الحكي .. و الكلام .. مفتقداه اوي
:((

ٍSOU يقول...

بطلى اى حاجة الا انك تبطلى تعيشى او تبطلى الحاجات اللى بتحسسك انك عايشة ...اووووووووووعى تبطليها