الأربعاء، 9 سبتمبر 2009

حاجات بناتي

حلو بس مش حاسه انه بناتي شوية؟؟
التعليق ده من كتر ما سمعته بقيت لما ماسمعهوش استغرب و اسأل ايه مش بناتي المرة دي
طبعا يجيني الرد لا بناتي بس...
من فترة اخدت قرار اني مش هاكتب تاني- واضح اني مدمنة قرارات مابنفذهاش في الأخر - القرار ده فضلت عليه سنة و نص تقريبا
توقفت مش عن الكتابه لكن عن محاولة الكتابة لأن بمنتهى البساطة كلما اكتب حاجه تطلع بناتي
فضلت كتير بفكر هو ليه فكرة الكتابة البناتي مضايقاني,يعني ماهو انا بنت -ده شيء المفروض يكون واضح يعني-فا كتابتي هاتبقى كتابة بناتي
...
الواضح بقى اني فضلت كتير بعيدة عن كل ما هو بناتي في الحياة, يعني مثلا ماكنتش بلعب لعب بناتي ماكانش عندي عرايس, أول عروسة جاتلي هدية كنت في تالته اعداي,غير كده كنت بالعب بالميكانو و البازل و الباتيناج و العجلة و أوقات بلعب راكت مع أختى و طبعا طبعا كنت بلعب كورة مع العيال في الشارع
أول مرة في حياتي حد يقولي "لا علشان انتي بنت" كان محمد ابن الجيران لما قولتله عايزه امشي شوية بالسكيت بورد بتاعته
قالي لا ماينفعش انتي بنت
ساعتها جاتلي صدمة انا بنت... اه انا بنت بس فيها ايه يعني ايه, اللي في الباتيناج يخليه بناتي و السكيت بورد يخليه ولادي فيه ايه فيا ناقص علشان مامشيش بالسكيت بورد؟؟
الموضوع ده كان عاملي ازمة, و مازال لحد النهارده مش شايفه ان فيه حاجه ماينفعش اعملها علشان انا بنت, ايوه فيه حاجات ماينفعش اعملها بس مش السبب اني بنت... دي حاجه بديهية جدا!!
بعد كده ماكنتش بحب كلام البنات و لا خروجات البنات ...
كنت بحس بالملل بصراحة, في الكلية فضلت سنتين من الأربع سنين البنت الوحيدة في الدفعة, اوقات كنت بشوف في عيون الناس" ايه ده دي بنت..و بتفهم!!!"
مع اني مش شايفه في دراسة الفيزيا اي حاجه صعبة عليا كبنت,اصلا مش فاهمه ليه اي دراسه في الدنيا يتأثر أدائي فيها علشان انا "بنت"
لحد وقت قريب جدا جدا
كان نفسي اخرج خروجات بناتي و اقعد قعدات بنات نظرا لأن دي حاجه مكنتش بعملها- تقريبا خالص-
بس كل مرة بروح و افضل اقول لنفسي انتي مابتعرفيش تخرجي خروجات بنات تقبلي الأمر الواقع بقى,
من فتره قريبه حصل حاجه غريبة جدا
كنت مع اصحابي و وصلت لنقطة انهيار, وقفت اعيط في الشارع "زي البنات"!!!, استغربت نفسي قوي بس ماكنتش قادرة اوقف عياط, بعد ما روحت و هديت اكتشفت طب مانتي اهه بتعملي حاجات بناتي ..
مش عارفه ليه مش حابة الحالة البناتي دي
و مستحملاها بس علشان مستنية المرحلة اللي بعدها
اني ابقى امرأة ناضجة, تعريفي للمرأة و الرجل تعريف يمكن يكون مختلف شوية ..و يمكن يكون غريب.
بس انا ديما عندي ستات و مؤنثات, الستات دول ليهم شخصية خاصة المؤنثات بقى دول اللي جم الدنيا لقوا نفسهم كده
ما علينا الموضوع ده شاغلني قوي اليومين دول
نفسي اكبر بقى و ابقى "واحدة ست"
ساعتها أكيد مش هاتضايق ان كتابتي "نسوية, أنثوية, نسائية"

هناك 5 تعليقات:

reham يقول...

مع انك بنوووتة اوى :))

ضحكت جدا على حكاية ان العياط في الشارع حاجة بناتي .. اول مرة اخد بالي ان عمري ماشفت راجل بيعيط في الشارع .. مع ان انا عن نفسي بعملها كتير جدا :)

انا عن نفسي بحب اتعامل على اني بنت و انى احس ان الى قدامي بياخد باله عشان مايجرحنيش مثلا ..
لكن مايستقلش دماغي .. احسن اديلو انا على دماغه :)) ( قال يعنى .. )

و الجو البناتى حلو اوى لما يكون مش تافه .. يعنى نقعد نتكلم كدة تحسي ان مينفعش راجل يطلع الكلام دة حتى لو اتكلم في نفس الموضوع .. يبقى فيه حالة تفهم عامة حتى لزلة لسان .. بحس ساعات بأمومة خفية في وسط القعدة

لكن نقعد نتكلم في ان " بيبو فرقع جيجي " ... و الذي منه ،،لاااا و الف لا

مسيري يوم احببك في القعدة البناتي
:)

مصطفى السيد سمير يقول...

دة يرجع لاختلال تعريف الولد والبنت لنفسهم وللجنس الآخر
يعني فيه ناس بتقول ان مينفعش راجل يتكسف حتى لو غلطان
والراجل هو اللي يشتم ويطلع اي كلام وميهموش والا يبقى بنت
مع ان اعظم رجل في التاريخ كله - عليه الصلاة والسلام - كان اشد حياء من العذراء في خدرهاومكانش فاحشا ولا متفحشا

دوسى في اللي انتي عايزاه وحباه وميهمكيش
حتى لو لعبتي كورة في الشارع

رضوى يقول...

ريهام
ايوه يا ريت تحببيني فيها و لك الأجر و الثواب من عند الله
***
مصطفى
و الله يا مصطفى بحاول أدوس
هي بس المشكلة اني فجأة بكتشف اني بعيد قوي عن الوسط اللي عايشه فيه
و غالبا في الوقت اللي بكتشف فيه ده بغير الوسط, مش بحاول اتغير
D:

بحلم يقول...

حلو قوي البوست يا رضوي
بس..مش ملاحظة انه بناتي شوية!!


وعاجباني كمان التعليقات بشدة
وزي مصطفي السيد بقولك دوسي ف اللي انتي عاوزاه ولا يهمك
بالنسبة للكتابة
كنت ومازلت اعتقد ان القضية مش تكتب ايه ولكن تكتبه ازاي؛ولسة شايفة كل حجة بتتحس تستاهل تتسجل وكل حاجة بتتشاف ممكن تتعالج
لو فكرتي ف حكاية دة بناتي ودة رجالي مش حتخلصي..صدقيني العالم بتاعة الكتابة الانثوية/نسوية/نسائية دي عالم معقدة و..احم..بلاش عنصرية(:

صديق عزيز مرة قاللي وسط نقاش م النوع دة: يعني مثلا تخيلي لو كانت"ذهب مع الريح دي" اللي كاتباها واحدة ست، شوفي بقي كانت حتكتبها ازاي!!!

رضوى يقول...

بحلم
واحشاني قوي
و الله متخيلة ان ذهب مع الريح لو كانت كاتباها واحدة ست كانت هاتبقى احلى كتير
ما علينا
كنت بقول زمان اني بكتب لأني مش قادرة ماكتبش
و بقيت متأكده من ده
الكلام بيخرج وقت ما هو عاوز وبالطريقة الأنسب غالبا
انا بس فضلت عندي حساسية من فكرة "بناتي" دي شوية كتير
أظني برأت منها زي حاجات تانيه

نورتيني