السبت، 29 أغسطس، 2009

جبانة ... ممكن

ايوه أجيد الهروب
بس مش شايفة في ده جبن
عارفه اني مش هاستحمل اكتر من كده فاباخد حالي و عزالي و بمشي
بمشي بسرعة ليه
علشان مابيبقاش فيه وقت دايما
بفضل موجودة لحد أخر لحظة و ببقى عارفاها من قبلها بكتير
عارفه انها قربت جدا و عارفه ان اللي بعدها مش هايبقى زي اللي قبلها ابدا
بفضل لأخر لحظه على أمل تحصل معجزة
-اقولكوا على سر عمر ماحصلتلي معجزات, هههههه, ماهو اكيد طبعا مش بيقولوا زمانها انتهى من زمان-
بس بستنى. اللحظات الاخيرة دي اللي بتعني اني اهرب باقصى سرعة
الوجع اللي جوايا منها هو اللي بيخليني امشي بسرعة من غير ما ابص ورايا للحظه
صحيح الهروب ده بيستهلكني
بيفقدني تركيزي, بفضل بعدها كتير اجلد نفسي مش كان ممكن لو كنت عملتي ....كانت تبقى الاوضاع افضل, مش كان ممكن لو كنت قلتي...ماكانش حصل اللي حصل.
ايوه بنقطع عن كل الناس .
ايوة بقضي ايام طويلة جدا في السرير
ايوه كل لما بشوف نفسي في المراية دموعي بتنزل من غير ماحس
بصراحة
انا عارفه اني طول الوقت باخد مسكنات
ادمنتها؟؟ . . .لا لسه شوية
عارفه ان كل الأوضاع دي مؤقته
عارفه ان كل الناس اللي حواليا دول مش هايفضلوا في مكانهم كتير
عارفه ان كلهم هاييجي يوم و يمشوا
عارفه اني هاعيش أوقات كتير لواحدي
بس كمان عارفه اني مش جبانة
انا بس مابقاش ينفع افضل هناك اكتر من كده
لمصلحتى . . . و لمصلحتهم
****
ده الجزء الكئيب أما ما يخص الجزء اللذيذ
أحب اقول اني سعيدة جدا بالطور الجديد
و علشان الحياة ألوانها و أصوتها . . . و كل حاجه فيها اتغيرت
فا كمان غيرت شكل المدونة
. . .
سعيدة سعادة مصدرها غير معلوم

ليست هناك تعليقات: