الثلاثاء، 14 أبريل، 2009

نوتة تليفون

ان تليفوني يبوظ و كل النمر اللي عليه تضيع دي ممكن تكون حاجه متوقه انها تحصل
كل لما أكلم حد أقوله تليفوني مات لدرجه أن صاحبتي الأنتيم أول ما قولتلها كده قالتلي ماتزعليش نفسك يا بنتي كان را...سوري تليفون أبن حلال
طب هو هو ده اللي عايزة اقوله أممممم أكيد لاء أنا اصلا جايه اقول حاجه تانيه خااااااااااااااالص
أنا جاية احكي عن نوتة تليفوني

اه تخيلو كان عندي نوته تليفون ,الورق دي و متقسمة على حسب الحروف الأبجدية كل حرف صفحه-ماكانوش واخدين بالهم أن دايرة معارفي أكبر من كده بكتييييييييييييير-اكتر من عدد صوابع ايدي ايه حد عنده مانع-المهم بالصدفه البحتة بفتح الدرج اللي فيه ورق سنة رابع -لسه ماتخلصتش منه لحد دلوقتي-ما علينا الاقي ايه بقى نوته تليفوني القديمة ياترى ينفع أقول أن قلبي كان حاسس أني هالاقيها مش متأكده بس جت على بالي كذا مره الأسبوع اللي فات
المهم لقيت النوته و هي غريبة من نوعها شويه باغ أه باغ ماقريتوش غلط جلدتها باغ امال يعني فاكرين انها صمدت طول الوقت ده و هي ورق و لا كرتون ,عليها صورة ميكي مجسمةو شوية الوان ملخبطة كده عادي طبعا اني اقلب في النوته و اقعد اقرا اسم اسم مكتوب فيها و كمان نمر التليفونات ده عزل و دي اتجوزت و دي مش فاكره اصلا اتعرفت عليها فين و لا حتى فاكره شكلها بس الاسم مش غريب عليا نمر قدمها اكواد بتقول انها في محافظات تانيه, طبعا مش فاكره من أكواد المحافظات غير اسكندرية ٠٣و البركة في الذاكرة الألكترونية للمحمول -عليه اللعنه-بس دول عرفتهم فين و أمتى مش عارفه
النوتة فكرتني بيا زمان
بني آدماية تانيه خالص مش ليها علاقه بيا دلوقتي غير أننا نحمل نفس الأسم و عدد قليل من الأصدقاء المشتركين

هناك 5 تعليقات:

آية مش هنا يقول...

آه
نفس الاسم .. و عدد قليل من الأصدقاء المشتركين.

مش عارفة اعمل :) .. و لا :(

العنكبوت النونو يقول...

انا هأعمل :)

nudy يقول...

اميرة انا كمان واجهت مشكلة النمر دي من قريب لما تليفوني اتسرق وضاع مني بعض النمر بس من يوميها رجعت تاني برضة لنوتي القديمة صحيح هي مش من ايام الجامعة لكن بفالها سنين والحمد لله صمدت مع انها كرتون
عارفة اد ايه الواحد لما بيفتح نوته القديمة بيفتكر احداث وتفاصيل وذكريات كتيرة قوي
لكن غصب عننا في ناس بتبعد وناس جديدة بتفرب

غير معرف يقول...

السلام عليكم
ممكن تعطيني قالب مدونتك

Manamino يقول...

بني آدماية تانيه خالص مش ليها علاقه بيا دلوقتي غير أننا نحمل نفس الأسم و عدد قليل من الأصدقاء المشتركين


عجبتني قوي الحتة دي
تصدقي فعلا الواحد ساعات كتير بيبص لورا يلاقي كان فيه ناس كتيرة قوي ليها نفس اسمه بالكامل ويمكن نفس الشكل بس مابتربطهمش بيه اي علاقة غير شوية اصدقاء مشتركين
وساعات مابيبقاش فيه حاجة بتربطم ببعض الا الاسم بس
تحياتي علي المدونة الجميلة قوي