السبت، 26 يوليو، 2008

سفر

واحد مرة قالي اني بفكره بواحده خطيبها مات
يومها رديت عليه و قلتله اني ما كنتش مخطوبه قبل كده لحد
و ان الحد ده ما ماتش ... او مات مش عارفه بيتهيئلي مش هاتفرق
ساعتها ضحك و قالي و لا كنتي بتحبي حد و مات
برضه لاء
***
ايه اللي فكرني بالكلام ده دلوقتي
يمكن اني افتكرت اني حبيت ناس كتير و سافروا
بخاف قوى من السفر
بخاف الناس تسافر و بخاف اسافر انا كمان
حتى لو كان مشوار صغير لحد اسكندرية
بخاف من التغييرو بتعلق بكل حاجه
حتى مكتبي و قلمي -اللي مش لاقياه دلوقتى و مش عارفه اركز في حاجه من غيره-و سريري و لعبتي
ايه اللي جاب سيرة التغيير دلوقتي
يمكن لان فيه تغيير كبير حصل في حياتي خلال الشهر اللي فات
فيه تغيير لطيف و منتظر و تغيير تاني موجع و مؤلم
ده التغيير اللي بيحصل للناس اللي حوالينا او حتى لنظرتنا ليهم اللي بتتغير مع مرور الوقت
انما بقى لما احنا نفسنا نتغير ده اللي صعب قوى عليا و غريب في نفس الوقت
يمكن لان عادي اني ابقى مستغربه اقرب الناس ليا لكن صعب اني ابقى مستغربه نفسي
امم ...من عشر ايام كنت في وسط البلد
وانا مستنيه اصحابي وقفت قدام بتاع جرايد في اول طلعت حرب
لمحت اعمال امل دنقل الكامله
بقالي اربع او خمس سنين
ليالي كتير بصحى و امد ايدي في المكتبة ادور على ديوان شعر
غالبا بمسك ليلى و المجنون لعبد الصبور
لكن كتير بحن لشعر أمل
طبعا الحل بسيط
ما تشتري الاعمال الكامله يا بنتى و تريحي نفسك
كنت كل مرة اوصل للرف اللي موجوده عليه و اقف قدمها
و ماشتريهاش
كنت طول الوقت مستنيه ان حد يجيبهالي
يومها يمكن من شدة الآلم لقيتني بمشي في اتجاه الميدان
دخلت المكتبة و اشتريتها
فضلت اسبوع مستغرباني
و يمكن مستغربه اكتر الاهداء اللي كتبتهولي
امم
عايزين تعرفوا كتبت ايه
لا كده كفايه قوى عليكوا