الأحد، 31 أغسطس، 2008

فانوس



اشعل شمعة فانوسي الجديد

و استمتع بليلته الأولى

رمضان كان واحشني قوي

هناك 3 تعليقات:

نهر الحب يقول...

كل سنه وانتم طيبين
رمضان كريم

اتمني مشاركتكم في مدونه باسمك نحيا

بحلم يقول...

يا بختك بقي بالفانوس الشمعة دوة..انا فاكرة طول السنين اللي فاتت كنت بتمني اجيب واحد، ودايما مكنش بيحصل مش عارفة ليه..من ساعة ما بدأوا يخترعوا فوانيس التكتك والعروسة اللي بتغني
أنا عاوزاه شمعة..الفانوس الشمعة ليه شكل تاني..ليه شكل حواديت ستي وليالي الحلمية وألف ليلة وليلة وفوازير شريهان..ليه شكل النوم بدري والصحيان الساعة اتنين بالظبط عشان السحور..ريحة الزبادي والفول ابو زبدة وصوت المسحراتي..الفانوس ابو شمعة ليه شكل ارهاق امي وهي قايمة تحضر السحور، وبابا وهو بيقومنا بالعافية ويقولنا:السحور بركة..والتليفزيون اللي بيوش الساعة اتنين ونص ..ليه شكل الحارة المنورة والشارع البعييييد اللي رحنا نجيب منه الفول للسحور زمان وتهنا أنا واخواتي،عدينا علي اسطبل خيل واكوام تبن وشوارع مهجورة مرعبة..الشارع دة قريب قوي انهاردة، وبعدي عليه مش بفتكر حاجة..أنا نفسي ف فانوس بشمعة قوي

العنكبوت النونو يقول...

عارفة يا هناء
ليه عمري ما جبت لنفسي فانوس بشمعة رغم اني كتير قوي كان قدامي وكنت اقدر اجيبه؟
عشان انا نفسي حد يجيبهولي
مش اي حد يعني
فيه حاجات كتير قوي بنبقى محتاجين حد يعملهالنا من غير ما نطلب
وحد معين واما بنطلب مش بيبقى ليها اي طعم
انا نفسي ف ورد بقالي كتير
وكل يوم اعدي على محل الورد رايح جاي وعمري ما اشتريت وردة
نفسي في حاجات كتير بس كلها عمرها ما هيبقى ليها اي طعم وانا لوحدي
بالعكس ساعات بيكون طعمها مر عشان بيفكرني اني لوحدي
بأشوف ده جدا في عنين ماما لما تطلب مني الشكولاتة ولما اجيبهالها من نفسي او لما بابا يجيبهالها
وبأحسه قوي كل ما افتكر اني في المرحلة اللعينة اللي ماعادش حد فيها فاكر اني هأفرح بأي حاجة
جايز عبط
على رأي الزهرة الزرقاء
:)
مش عارفة بقى
كل اللي انا عارفاه ومتأكدة منه ان انشاء الله في يوم من الأيام هيكون فيه في حياتي حد بيعرف انا عايزة ايه من غير ما اقول ويعمله وافرح ويفرح هو بفرحتي
كل اللي نفسي فيه وبأطلبه من ربنا
ان يوم ما الحد ده ييجي اكون انا كمان ذكية كفاية وبحس كفاية عشان اعمل نفس الحاجات
:)
ايييييييييييييه
ما انا حلوة وأنا ساكتة بتخلوني اتكلم وتقلبوا عليا المواجع ليه بس