الاثنين، 15 أكتوبر، 2007

عايزة.... اتعلم


خير الله ما اجعله خير

بقالي كام يوم عايزة اطبخ

و دي حاجه غريبه عليا طبعا

حاسه اني عايزة اقف في المطبخ و اعمل اكلات و حلويات

و اعزم كل اصحابي و حبايبي و ناكل مع بعض

فاتلاقوني بقالي كام يوم بتابع برامج الطبخ

و الله ما بتعلم حاجه

بس اديني بتفرج و خلاص

و كل ما اروح المكتبة استعير كتب

امي تلاقيني راجعلها بكتاب طبخ

المشكله ان عندي امتحانات

مش وقت الكلام ده يعني

مشكلة جيلي من البنات ان اغلبنا مش بيعرف يطبخ

واحدة صاحبتي ناوية تتعلم كل الاكلات اللي خطيبها ما يعرفهاش

علشان لما يتجوزوا ما يقولهاش الاكله دي مش بيبقى طعمها كده

مش عارفه بس كان اهتمام الاهل طول الوقت ان البنات يتفوقوا دراسيا

و كانوا ناسيين موضوع المطبخ ده خالص

انا مثلا كنت غلاباويه قوى و انا صغيرة

-و لحد دلوقتي و الله-

كنت اقف مع امي في المطبخ اصدعها

و الخمها و كانت دايما تنسي الاكل على النار علشان بتتناقش معايا

"يلا اخرجي بقى مش عايزة اشوفك قدامي"

مرة اسألها هما ليه الناس سموا الطماطم طماطم و الخيار خيار

ماما هو في ايه في الطماطم يخليها طماطم و في الخيار يخليه خيار

"يلا اخرجي بقى مش عايزة اشوفك قدامي"

و مرة اقولها

ماما هو ليه الارقام واحد اتنين تلاته مش واحد تلاته اتنين

يعني ليه مش واحد زائد واحد يساوي تلاته

"يلا اخرجي بقى مش عايزة اشوفك قدامي"
بس اللي افتكر انه كان مجنني قوى
هو الناس ازاي عرفت الوصفات اللي احنا بنطبخها
يعني ايه تطور الطبخ من ساعة ما اكتشف الانسان النار
لحد المحشي و الملوخيه

و على كده

نرجع تاني لموضوعنا

تفتكروا ممكن اتعلم الطبخ فعلا

و لا خلاص بقت حالتي ميؤوس منها

الخميس، 11 أكتوبر، 2007

قهوة


أحب اقعد على القهوة مع القاعدين
وابص في وشوش بشر مش مخلوقين من طين
واحد كإنه تحتمس، يشرب القرفة
والتاني غلبان يلف اللقمة في الجرانين

الثلاثاء، 9 أكتوبر، 2007

رسايل....sms



عندما أفتقدكم
لن ابحث عنكم بعيدا
بل سأنظر إلى اعماق قلبي
حيث تكونون دائما
فليس الحب ان تبقى دائما بجانب من تحب

smsوصلتي في رسالة
من صديقة عزيزة على قلبي
و اذكر اني استخدمتها بعدها و ارسلتها لاحدي الصديقات العزيزة على قلبى كذلك
طب يعني عايزة اقول ايه
لما وصلتني الرسالة دي
و قريتها
اذكر اني ابتسمت و تنحت شوية و دمعت شويتين
فعلا ليس الحب ان تبقى دائما بجانب من تحب
لكن
هو مش نبقى مع بعض على طول بس مع بعض يعني
يؤلمني جدا
ان احتاج للكلام معكم و لا اجدكم
طب ايه
رسالة تانيه بقي علشان الحبايب

it's hard at times

to keep in touch

with those who mean so much

but side by side

or far apart

you will always be in my heart

الرسالة دي بقى
على العكس من سابقتها
اتضايقت جدا لما
وصلتني
اقدر اقول اتغميت
يمكن كمان علشان اللي بعتتها
انا مش متخيله ان ممكن فيه حاجه تشغلنا لدرجه ان يبقى صعب الاتصال ما بينا
طلب غلس
ممكن لو فيه حد بتحبوه بجد و بقالكوا كتير ما تكلمتوش
تقوموا تكلموه او حتي يعني تدولوا رنه مش هاتكلف حاجه


الأربعاء، 3 أكتوبر، 2007

مكالمة


انظر للهاتف

اجلس على الكرسي المجاور له

احاول التنفس بهدوء


ارفع السماعة


بمجرد ضغطي على اول زر من ازراره


يرتفع نبضي


اعيد السماعة مرة اخري


هدي نفسك شوية ايه اللي انتي عاملاه ده


احدث نفسي


مجرد مكالمة عادي


اكررها


عادي


ارفع السماعة بسرعة اضغط على ازراره


يأتيني صوت مألوف


تيت تيت تيت


اتنفس الصعداء


الحمد لله


الخط مشغول