الاثنين، 15 أكتوبر 2007

عايزة.... اتعلم


خير الله ما اجعله خير

بقالي كام يوم عايزة اطبخ

و دي حاجه غريبه عليا طبعا

حاسه اني عايزة اقف في المطبخ و اعمل اكلات و حلويات

و اعزم كل اصحابي و حبايبي و ناكل مع بعض

فاتلاقوني بقالي كام يوم بتابع برامج الطبخ

و الله ما بتعلم حاجه

بس اديني بتفرج و خلاص

و كل ما اروح المكتبة استعير كتب

امي تلاقيني راجعلها بكتاب طبخ

المشكله ان عندي امتحانات

مش وقت الكلام ده يعني

مشكلة جيلي من البنات ان اغلبنا مش بيعرف يطبخ

واحدة صاحبتي ناوية تتعلم كل الاكلات اللي خطيبها ما يعرفهاش

علشان لما يتجوزوا ما يقولهاش الاكله دي مش بيبقى طعمها كده

مش عارفه بس كان اهتمام الاهل طول الوقت ان البنات يتفوقوا دراسيا

و كانوا ناسيين موضوع المطبخ ده خالص

انا مثلا كنت غلاباويه قوى و انا صغيرة

-و لحد دلوقتي و الله-

كنت اقف مع امي في المطبخ اصدعها

و الخمها و كانت دايما تنسي الاكل على النار علشان بتتناقش معايا

"يلا اخرجي بقى مش عايزة اشوفك قدامي"

مرة اسألها هما ليه الناس سموا الطماطم طماطم و الخيار خيار

ماما هو في ايه في الطماطم يخليها طماطم و في الخيار يخليه خيار

"يلا اخرجي بقى مش عايزة اشوفك قدامي"

و مرة اقولها

ماما هو ليه الارقام واحد اتنين تلاته مش واحد تلاته اتنين

يعني ليه مش واحد زائد واحد يساوي تلاته

"يلا اخرجي بقى مش عايزة اشوفك قدامي"
بس اللي افتكر انه كان مجنني قوى
هو الناس ازاي عرفت الوصفات اللي احنا بنطبخها
يعني ايه تطور الطبخ من ساعة ما اكتشف الانسان النار
لحد المحشي و الملوخيه

و على كده

نرجع تاني لموضوعنا

تفتكروا ممكن اتعلم الطبخ فعلا

و لا خلاص بقت حالتي ميؤوس منها

هناك 4 تعليقات:

بحلم يقول...

زمان كنت بعرف اعمل الرز المفلفل_ قوي،وعلمته لاختي الكبيرة وممكن لماما كمان الله يرحمها..بس لما اختي بقيت هي اللي تطبخ ، وبعد ما بعدت سنين عن عمايل الرز،جيت اعمله تاني لقيت نفسي بوظته، بس رجعت اعرف اعمله تاني بسرعة، افتكرته مش اتعلمته م الاول
دة بقي معناه ايه، هل الطبيخ فن لا ينسي زي القراءة والكتابة، والا هو فن ينسي بالاهمال
مش عارفة بقي
بس عموما انا بعرف اخترع حاجات ،_ وعندي ثقة كاملة اني لو حطيت ف دماغي اني افنن، حعمل حاجات محصلتش، رغم ان العيلة كلها بتتريق علي وبتعتبرني فاشلة طبيخيا
عملت العيد دة بيتي فور ، ودي حاجة_ محدش عملها ف عيليتنا قبل كدة،كلهم قالوا انه عادي، بس انا شايفاه عبقري بقي لعلمك

fawest يقول...

بعد ماشاب ودوة الكتاب
عليكى و قناة النيل لاسرة و الطفل فى برنامج هناك هايل


المهم عرفت مرة من
أختى ان زميلتها فى الشغل بتسيب طفلها مع مربيها
أستغربت طبعا على إية
قلت لها أمل امها مش عايشة تقدر تخلى بلها من الطفل حتى ترجع من الشغل
قالت لى مهيا المربية دى اللى اربت البنت صاحبت أختى
وامها كانت بتروع الشغل وتسافر
قلت لاختى على كد هسأل اللى هتجوزها بعد عمر طويل إنشاء اللة
إذا كانت تربية مربية ولا أم
علشان أضمن تربية أبنى
مش ناوى أسيبة لبيبى سيتر
وبعد كدة تلوموا الشاب لو سأل خطيبتة عن أصناف الاكل الى عاوزيكلها
وترد اتلخطيبة بألاطة إعمل حسابك على الاكل الجاهز و لا روح لامك تاكل عندها
و بالمرة أجيب أمى تربى عيلى
يبقى أتجوزت لية
علشان أقعد اتفرج على جمالها
طب البنات على أفا من يشيل

حسن أمين يقول...

عايزة تتعلمي ؟!
جميل ..دي رغبة محمودة أكيد .
مش عايز أكبر الموضوع دلوقتي بس احتمال أكتبه قريب على المدونة لأنه عامل لي وش في دماغي ..امم
أصل الموضوع مرتبط بالتصور المجتمعي للمرأة ..مش مسألة سد حاجة الإنسان من الطعام ..أبدا
يعني بتعرفي تطبخي إذن انتي زوجة صالحة !
وكتير أوي من نتايج تترتب على المعلومة دي :
بنت ناس ، بنت أصول ، طائعة لأمها ، شبعانة في بيتها ! إلى آخر الاستنتاجات العبقرية دي
حلوة أسئلتك عن البديهيات والمجردات ..فكرتيني لما قلتي انك بتحبي العلم المجرد (الجبر) انتي استثناء بصراحة .
ربنا يوفقك لما يحبه ويرضاه يا رضوى ..وكل سنة وانتي بألف خير

محمد العدوي يقول...

انت تقومي تذاكر احسن حيث ان وراك امتحانات زي ما بتقولي ..

يعني متعلمتيش الطبخ في كام وعشرين سنة وجاية عند الامتحانات تحني له ..


الموضوع سهل جدا .. اسأليني أنا حيث اني مطبخجي محترف .. عاوز بس نظرة عميقة وخيال .. وهتلاقيك ألفت كتب جديدة في الطبخ مش ذاكرينيها ..


ثم يعني عم اسم ايه الطباخ وعم اسمه ايه أيضا السفرجي راحوا فين ..


كل الود