الجمعة، 3 أغسطس 2007

استاذي الغالي

كان بقالي كتير جدا ما شوفتوش تقريبا شهر و نص او شهرين كل شويه اقول هاكلمه في التليفون و بعدين مش عارفه ليه بكسل مع اني نفسي اتكلم معاه قوي بس مش عارفه ليه كنت كل لما امسك تليفوني و اجي اطلب نمرته اقول طب خليها كمان شويه و بعدين انسي تاني
من يومين قابلت واحد من اللي بيشتغلوا معاه و سألته عليه قالي اصله مش بينزل كتير زي الاول لانه تعبان انا اترعبت تعبان ليه بس قالي عينه تعبانه شويه مش عارفه اقول اد ايه خفت عليه بجد و حسيت اد ايه انا مقصره في حقه هو فعلا زي بابا , قعدت اقول لنفسي هو يعني ينفع واحده باباها يبقي تعبان و تعرف بالصدفه المهم عقدت العزم على اني اكلمه اول ما اروح البيت و طبعا روحت و اتشغلت مش فاكره في ايه
تاني يوم كلمته في التليفون كان عندي كلام كتييييييييييير جدا اقوله له بس مش عارفه ليه المكالمه كانت قصيرة جدا جدا كل اللي قلته ساعتها
انا فلانه
ازي حضرتك
اخبار عينك ايه دلوقتي
طب انا بس كنت بتطمن عليك
مع السلامه
بعد ما قفلت حسيت بالغباء الشديد كان فيه حاجات كتير عايزه اقولها بس مش عارفه ايه اللي حصل
ربنا يكرمه و يشفيه و يرجعه لينا بالسلامه
طلب غلس شويه
ياريت كل اللي يقرا البوست ده يدعي له

هناك 8 تعليقات:

الجحيم يقول...

السلا م عليكم
شفاه الله وعفاه


تحياتى

اميرة يقول...

امين
مش عارفه اقولك اد ايه فرحت لما لقيت تعليق منك
بس يا عم مش تحن علينا بقي و تفتح المدونه بتاعتك للجمهور المسكين
منور

فريدة... يقول...

هذه الكلمة
استاذي

كلمة كبيرة قوى ومعناها جميل فوق الوصف
ومع ندرة اصحابها
اتصور مقدار ما يمكن ان يصيب قلبك وقلب كل من له استاذ مريض او مصاب بأي اذى

حقا شفاه الله وعفاه

ربنا يكرمك يا جميلة

اميرة يقول...

فريدة الفنانة الجميلة

نورتي مكاني المتواضع يا فندم

و الله العظيم واحشاني جدا

فريدة... يقول...

ان الخميس لناظره قريب ان شاء الله
يا مغمورة

كرياكو يقول...

سلام عليكو

ربنا يشفية


وشعور جميل منك اوى


كرياكو

اميرة يقول...

منور يا كرياكو

غير معرف يقول...

تعرفى إنى كده كمان
كل يوم أروح متأخر يكون نام
ومرة قولت أكلمه يوم الجمعة بعد الصلاة للآسف مكنش موجود
لغاية دلوقتى مكلمتوش
بس أقول لما أخرج من هنا هاكلمه من أقرب سنترال و مش هاستنى لما أروح

ربنا يشفيه